港姐一向被称为「美丽与智慧并重」，以前能够当选，大部分都系实至名归，好似有「最美丽港姐」朱玲玲、「大美人」李嘉欣、「靓靓」袁咏仪及「硕士港姐」郭蔼明等，令观众印象深刻，大多数当选后，加入影视圈发展！再睇番今届港姐初赛出现一堆「极品」，更有「吊带祖蓝」、「间尺鼻Angelica」呢啲话题人物现身，网民都想问时至今日嘅香港，唔通真系得港女冇靓女，好在啱啱完咗复选，大台算系「洗太平地」，剩低嘅素质已经平均咗……虽然也有「好动李若彤」Kelly、「高版乐瞳」张宝欣等较为似大热，不过惊艳指数都不及当年……难怪有网民要搞个选举，回一回带睇番历届咁多港姐，选边几位喺大家心中系最靓嘅港姐，网民King Jer早几日喺facebook搞咗一个投票，答案噚日终于出炉，一共有逾万位网民参加是次网上投票。

    排头位有啲「爆冷」，竟然系2012年季军朱千雪，有2989票成为第一。

    未知系唔系因为佢近年重返校园，读紧城大法律博士学位，呢个好学不倦嘅精神，同埋喺大台剧认真嘅演出，为人贴地得嚟又唔高调，令观众眼前一亮，加咗唔少分！而排第二就系1991年冠军郭蔼明就有2479票，郭蔼明以美国南加州大学机械工程学硕士生参选，有学历、有美貌，难怪好快被刘青云「私有化」，早前再重播当年佢有份演嘅《大时代》，大家再睇番o依家嘅郭蔼明都系keep得咁好，绝对系真美人！！最惊喜仲有排港人心目中最靓港姐第三名嘅……邱淑贞，就有1807票，当年邱淑贞参选，是非不绝，最终因压力问题，中途退选，之但系「豆豆」邱淑贞依然系港人心目中嘅女神级，喺90年代影圈当中，同王祖贤、林青霞、锺楚红、李嘉欣等，并列为绝色美人。